Thursday 29 May 2014

HTS WORLD CUP PREDICTION CHUNGCHANG

Khawvela show ropuitak World Cup khelna ding khawm a hnai ta hle a. Hmartoday Sports chun World Cup sung hin Prediction buotsai nawk kan tuma. Tiemtu hai khawmin in min hnikpui nawk ngei kan beisei. 

Tuta World Cup hung um dinga prediction buotsai ei tum hi nidanga ei thawdan le khan an ang naw met a. Hi chungchang inhriettirna kan hung siem hi ṭhataka lo tiem seng dingin kan hung ngen nghal cheu a nih.

Prediction ei thaw reng reng hin nidang khan chu ring indik laia a vangneitak lottery hmangin ei thlang suoka. Tuta ṭum ruok chu points insangtak hmu mi pathum in lawmman an dawng ding a nih. Chun lawmman ding hi a zat chie ei la hril thei naw a chu a mawitawk thaw ei tum bawk a nih. Iemani ti a tlawmngaia "kei khawmin lawmman ding chu zat chu lo tum veng ka tih" ti nuom dam ei um chun kawt lientakel ei hawng zing a nih.

 PREDICTION EI THAW DAN DING CHU :

1. World Cup ṭan ani anthawk a tawp chen (final match) prediction hi ei hawng ding a nih.

2. Prediction post kan hung siem zatin lo predict zieng in ta, ring indik hai po chu an points ei blog (hmartodaysports.blogspot.com) ah ei update pei ding a nih.

3. Match po po hi ei predict vawng ding tina ani naw a. Predict ding post kan hung siem hunah in lo predict tawp el ding a nih. Ana chu a tamthei ang tak prediction thaw ei tum a nih.

4. Match tina scores le indik thlapa ring indik hai poin points 3 hmung an ta. Result ring indik ringawt hai chu points um naw nih.

5. Points scores hi blog ah update zing ning a ta, enthei zing ni bawk a tih.

6. Final match khelzo ani hunah points hmu insangtak mipathum in lawmman an dawng ding a nih.

7. Points inang an um chun an lawmman dawng insem an tih. Entirna dingin points 15 hmu a lawmman pakhatna dawngtu mi pahni an um chun an lawmman dawng insem an tih. Chuong ang bawkin pahnina le pathumna hai khawm.

8. Post tina ei result hi a hranin hung puonglang ni naw ni a. Points ei hmu zat hai chu hung update zing ning a tih(blog le ei facebook page ah).

Awle, ei fie thawkkhatah ngai ei ta hrietthiem naw dam ei um chun comment ah indawn thei ning a tih.

Thursday 22 May 2014

Sagna Manchester City ah . Kroos Manchester United ah

Daily mail in a tarlang danin Arsenal defender Bacary Sagna chu free transfer in Manchester City a zawm fel tah thu an puonglang. Tony Kroos khawm Bayern Munich anthawk £20million in Manchester United zawm dingin anin biekfel ta thu an puonglang bawk.


Bacary Sagna hi contract thar chung changah Arsenal le vawi 3 lai anin biek ta a chu anin rem thei naw a. Ama hin kar khata £100000 chung a phut a. Hi hi Arsenal chun pek anin zuom naw nih.

Sagna hin City ah kum 3 dei contract a zieka, kar khatah £150,000 lai a hin a hlaw ding a nih. Arsenal ah kum 8 lai hun a lo hmang ta a. Thla thar June 1 hin official takin City a zawm thu hi puonglang ning a tih.
_______________________

Daily mail bawkin a tarlang danin Manchester United Chun Bayern Munich midfilder Tony Kross chu £20 million senga laklut dingin anin rem tah thu an puonglang bawk.

Kroos hi United ah David Moyes a um lai deia laklut dinga an loin biekrem tah niin, a pu hlui Louis van Gaal hnuoia khel a chak hle ni a hril a ni bawk. Ama khawm hi Bayern le contract thar chung changa inbierem thei lo an nih.

Hienglaizing hin a team-mates Robben khawm laklut tumin United hin an bei mek niin an tarlang bawk.

Friday 16 May 2014

11th Hmar Martyrs' Trophy Champion; B.Aijalon



Vawisun khan Saikot playground ah 11th Hmar Martyrs' Trophy closing ceremony hmang niin final match khel ani a. Final match hi FAST (Rengkai) le B.Aijalon haiin an khel a. B.Aijalon haiin 2-0 a hnena changin Hmar Martyrs' Trophy champion an ni tah.
Naute khawm in inhawi a ti ie...


Inkhel tan hma hin Hmar Martyrs' Day hunser ursun taka hmang a ni a. Hlasakthiem tak tak haiin mipui anin awi a, mipui na a tlei hle. Returnee haiin martyrs hai inzana chibai bukna hun pawimaw tak an hmang bawk. Hun hi ti hun takah tan thei ani naw a. Inkhel hun khawm hi sukhnuk a ni pha bawk.


Final kai team pahni hai hi ei hriet angin team thatak an ni a. Players neitha ve ve an ni bawka. Inkhel en khawm an hawi hle. Inkhel entu mipui hi an tam hle a. Martyrs Day ei hmang lai po a chu a tam pawl tak khawm ni ngei ei tih.


Inkhel tan ani a, beisei ang ngeiin hmunuom a um nghal. FAST haiin chance nei hmasa lemin goal khawm an thun teu hle. Anin khel sawt deu deu a, B.Aijalon hai kheltha deu deu in chance khawm an nei rawn hle. 1st half a hin team pahni hai hi anin hnetawk ang renga chu Aijalon hai an chunghnung lem deu. Aijalon haiin chance tha an nei hmang tangkaiin goal 2 10mins sung an thun a. 1st half ah 2-0 in hma anthuoi. 1st half tawp hma hin FAST player No. 16 Naughton in hnaite ah goal shot thatak a nei a, keeper in ropui takin a lo save. Kha zet kha chu a class an sang khawpel.


2nd half antan a, beisei a phak ta naw hle. FAST hai hi an tha ansut deu ta niin an langa. Aijalon haiin game khawm an thunun ta hle. Half chance a um zeu zeu ti lo chu Aijalon hai hin an nawr lem a. A hratlem ding awm chu an hriet thei. 2nd half tawp tawm hin FAST hai game in hma a sawn met a. Nawr khawm an nawr ve nasa hle. An thaw ra sikin 85mins vel ah penalty an hmu a. Hi penalty hi David chun petin keeper in ropui takin a lo save.


Hi zo hin FAST NO. 10 Michael chu red card hmuin hnawtsuok a ni a. Hun khawm a tawp zui nghal. B.Aijalon chun FAST (Rengkai) chu 2-0 a hnein Hmar Martyrs' Trophy an dawm ta a nih.

Wednesday 14 May 2014

Bela Guttman tawngsie inphur Benfica chungah Kum 52 sung a la fe pei

Bela Guttman hi kum 1960 khan Portuguese club Benfica manager dinga ruot ani a. Manager ani anthawk kum 2 sung European Cup pahni lai a lakpui nghal a nih.

Kum 1962 kuma European Cup an dawm zo khan Benfica thuoitu hai chu inhmupui hienga hlawtlingna ramah Benfica a thuoilut lei hin, hlaw sang lem phu a in hriein, a hlaw suksang dingin a ngen a sienkhawm a ngen na hi hnawl pek a nih.

Hienga a ngenna hnawl pek ani lei hin Bela Guttman chun lungawinaw takin Benfica a suoksan a tawngsie an phur zui tah a nih. Bela Guttman chun " Tuta inthawkin kum 100 sung Benfica hi European Champion ni ngai naw ni hai" tiin a hril.

Kha taka inthawk khan Benfica hin European Cup vawikhat khawm an la chawi naw a. Champions League final 5 haiah an hrat ta naw a. UEFA Cup/Europa League pathum ah an hrat ta naw bawk. A nuhnungtak chu vawizan kha niin Sevilla chu penalty shoot out ah an hne nawh.

Monday 12 May 2014

Semi Final duthusam thlirna


11th Hmar Maryrs’ Trophy khel mekah a vawrtawp a hnai ta hle a. Zinga hin semi final hmunuom um takel ei hmu ding ani a. Hieng neka semi final duthusam lem hi a um nawk chuong thei ta ding manih? Hieng semi finalist team 4 hai hi a tu tu khawm final kai hai sienkhawm an phu vawnga. Semi final match ding khawm hi final match ding khawmin in sit an um naw hle.

Hmar Patriots vs B. Aijalon
----------------------------------

Hieng team pahni hai that zie chu hril rak khawm a ngai nawh. Team khawngtak Player tha tak tak fuonkhawm an ni a. Team balance khawm duthusam deuthawa tha ve ve an nih. Hmar Patriots hi team thar niin Player tha tak tak lakkhawm an ni a. An defence a phuoi ang bawkin midfield anin hrawl em em a. Winger an nei tha a. Keeper chenin an tha em em a. Hieng hai hi an hratna bulpui pakhat chu a nih.  Hmar FC ta ding khawma lo khel hlak Ramsang Captain na hnuoiah hin Chalrang player tha tak tak an um nuola. Hieng hai che vel hi zinga chu hmunuom um tham tling nei a tih.


Hienglaizing hi Aijalon team khawng zie chu a en haiin ei hriet chieng hle ring a um. Goalkeeper an nei tha a, midfield ball semthiem tak tak player an um nuola. An striker haiin an goal thun thei zie an la theinghil naw chun goal thun an harsat lawm ring a um nawh. Zinga chu match inhnetawk tak beisei ei ta. A tu tu khawm hin hnena chang haisien thilmak ni naw nih.
_____________________

FAST (Rengkai) vs Sielmat FC
Hi zet hi chu local football ngaina tu hai ta ding chun hieng neka match duthusam lem hi a um chuong ding mani? Hmar players ṭha fuonkhawm na team pahni hai in nuoi ding mawl hi a nih Hmar Martyrs' Trophy suk phuisui tu pakhat chun.
Sielmat le FAST (Rengkai) hai hi Hmar Martyrs' Trophy khel mekah hin fans neitha tak ve ve an ni a. A bikin Sielmat FC hai thawm hi a tha zuol a. An ni hi eiin pak naw thei nawh. Martyrs' Trophy ṭan ani anthawk khan an ri a ṭha em em a tournament sukin hawitu pakhat an nih ei ti naw thei nawh.

FAST hai hi nikum a finalist kha an ni a. An ni hi iengtik lai khawm team khawng tak an ni zing a. An passing a mawiin "HMAR tiki taka" football an min entir thei zing hi inpak an um hle.. Ieng position a khawm an ṭha vawnga, ana defence hi anin phan na lai deu niin an langa chu team khawngtak chu an ni zing tho a nih. Forward tlanhrat tak tak goal thunthei em em an nei a. Hieng hai hin zingah Sielmat FC hmungtlar khautak an paltlang thei dim chu.

___________________________

Sielmat FC.

Tukum zet chu mipui po po mit fukna chu Sielmat FC hi ni ngei a tih. An ni hi player ṭha hlang um khawm ni an ni a. Local players inlar tak tak an kat nuol a nih. Keeper thatak an nei a. An defence hi Hmar FC rawlbang Daniel Hmar in rawina hnuoiah umin tuta Hmar Martyrs' Trophy khel mekah defence khau tak ti inla khawm ei hrilsuol lawm ring a um nawh.
Midfield ah player ball thiemtak tak an um a. Winger tlanhrat tak tak an nei a. An ni hin Hmar FC striker Lalzarzo @naute an chawm ding hi hawphur um tham tling ngei a tih.

Sielmat FC hi champion thei ding hiel a ṭha an ni a. Sienkhawm semi final ah FAST hai kher kher anin khelpui ding hi chu lawm bik bek naw ni hai.
Awleh, iengkhawm nisien zinga chu match hmunuom um tak beisei ei ta. A tu tu khawm hi final kai thei vawng an ni a. Goal nal tak tak khawm beisei bawk ei tih.

Aijalon le Sielmat FC semi final anin hlangkai

11th Hmar Martyrs Trophy khel mekah vawizantieng khan quarter final nuhnung lem khel ani a. Match hmasa lemah B.Aijalon chun Hmarveng YC chu 5-1 laia sawpin semi final anin hlangkai a. Match nuhnung lemah huntamlem kim lo a khel Sielmat FC chun VL RUATA Memorial Team chu 4-1 a sawp ve nawkin semi final anin hlangkai ve nawk.

B.Aijalon 5-1 Hmarveng YC

Hieng team pahni hai hi team sie chu ei ti thei naw a. Ana chu Aijalon hai hi player neitha lem an ni a, an ni hi ringkai lem an ni angin harsa lo takin semi final anin hlangkai tah a nih. 1st half a hin Aijalon haiin goal 2 an thun a. 2nd half ah goal 4 an thun nawk a. Ana chu vangduoithlak takin an defender pa in an goal tieng a head lut hlau.

Inkhel tan ani a, beisei ang ngeiin Aijalon hai an chunhnung lem nghala. Ana chu chance anin siem el thei bik nawh. Hmarveng khawm 1st half a chu an kheltha ve hle a, half chance khawm an nei ve zeu zeu . 30 mins velah freekick anthawk Aijalon hai in goal an hung thun a. 1st half tawp tawm in goal khat dang thun nawkin goal 2 in 1st half ah hma anthuoi.

2nd half a hin game a danglam ta hle a. Aijalon haiin inkhel an thunun ta hle. Kawng iengkimah Hmarveng haiin an phak naw ani tak. Harsa lo tak tak in goal 2 an hung thun nawka 4-0 a hma anthuoi lai Aijalon defender pakhatin an tieng a head lut pal a 4-1 in hma anthuoi. Hi zo hin hun tawptawmah goal khat dang an thun nawk a 5-1 laia hnena changin semi final anin hlangkai tah a nih.
*****************************

Sielmat FC 4-1 VL Ruata Memorial

Hi zet hi chu game boruok hrim hrim khawm a dang hle. Ei hril ta angin Sielmat hai hi fans neitha em em an ni a. An fans haiin player hai nasatakin an sukphur. Chuong ang bawkin Saikot khawm fans an neitha a. An home ground ani bawk inkhel en an hawi takzet.

Sielmat hi player neitha an ni a ringkai lem khawm an ni bawk. Saikot khawm hi an player hai an sie naw a players skill neitha tak tak an kat ve nuol.

Inkhel antan a, mipui an phur in game a hot nghal a. Ringlo takin Saikot haiin corner anthawk ball fe pei ah goal an hung thun a. 1-0 in hma anthuoi. Sielmat in hung nawr let ve nawk nghalin goal an hung thun ve a. Goal anthun anthawk sawtnawte hnungah goal khat dang hung thun ve nawk nghalin 2-1 in hma anthuoi. 1st half tawp tawm hin Sielmat player pakhat red card pek ani a. Kim loin Sielmat in khel sunzawmin 1st half ah 2-1 in hma anthuoi.

2nd half a khawm Sielmat an kheltha hle a. Kim lo a khel inlang naw khawm hielin an khel a. Goal chance khawm an hau hle. 2nd half tan ani anthawk sawtnawte hnungah Daniel Hmar chun goal a hung thun a 3-1 in hma anthuoi. Hun a fe pei a, Sielmat in an nawr sunzawm zinga Saikot haiin chance an neithei naw hle. A bik takin Sielmat hnung tlar Daniel Hmar le Immanuel Intoate hai an kheltha in Saikot forward hai hunawl an pek naw hle.

2nd half chenve a pel tah ti a, through ball thatak Sielmat Striker Lalzarzoin a tlanlut pui a, 1st time a shot nghalin box puo ah Saikot keeper in a ben thlaka. Referee chun red card pein a hnawt suok a. Hi freekick fe pei anthawk Tluanga chun goal hung thun nawkin Sielmat in 4-1 in hma anthuoi. Hun tawp zui nghalin Sielmat chun 4-1 a hnena changin semi final anin hlangkai.

Sunday 11 May 2014

2014 Barclays Premier League Champion; Manchester City

Vawizan khan Premier League game nuhnungtak chu khel a ni a. Manchester City chun Etihad Stadium ah West Ham United chu an lo mikhuol a. Samir Nasri le Kompany goal thun hmangin 2-0 a hnein kum 3 sung a vawihnina dingin Premier League nomawi Manchester United kawllai lakpekin an CHAMPION tah.

Manchester City hin Premier League game 38 khelah points 86 an hmu a. Pahnina a um Liverpool in points 84 an hmu bawka. City hin points 2 a hmathuoi falin an champion a. An home game 19 haiah 17 lai hnena an chang. Premier League ah goal 102 an thun bawk.

Liverpool hin an game nuhnung takah Newcastle United chu 2nd half 62 mins chen 1-0 in an hne nawa. 63 mins le 64 mins haiah Agger le Sturridge in goal hung thunin 2-1 in lethal hai sienkhawm kawk a um zo ta naw a. City hin points 2 a hmathuoi falin Premier League nomawi an dawm ta a nih.

Inkhel tan ani a, beisei lawk ang ngeiin Manchester City in game an thunun nghala. Ana chu goal chance an nei el thei bik nawh. City hai hi an fimkhur a, a pawng a pui chun West Ham in an nawr el naw a. damte te a in pass in chance an zawnga half chance ti thei chu anin siemdawk nuol. Nasri, Yaya le Silva an kheltha nawk hle a, Ciy game sukhringtu tak an nih. 25 mins ah Kolarov chun box puo anthawkin long shot thatak a nei a West Ham keeper in ropui takin lo save. Hi zo hin City chun an nawr sunzawm zinga 39 mins ah Samie Nasri chun box puo antnawk bawkin long shot an thawk goal a thuna, City chun 1-0 in hma anthuoi. 1st half tawp tawm khawm hin Silva chun goal a thun teu nawk hle.

2nd half an tana, City bawkin ball changrawn lemin gam an thunun hne hle a. West Ham hin goal chan tha an nei naw el khelah inkhel sung po po hin shot on target (goal zawna pet) an nei thak nawh. 49 mins ah City captain Kompany chun goal hung thun ve nawkin City chun 2-0 in hma an thuoi a. Game tunun tah in chance khawm an hau nawk hle. 77 mins ah kheltha em em Nsari chun goal a thun teu nawk hle. hnaite a a shot thatah chu keeper in a kein a lo dang hram. Goal dang lut ta loin City chun awlsam takin 2-0 a hnena changin Premier League title an lak.

inkhel tawp char hin City fans a sang tel chu field sungah tlanlutin hnena hlado anin sama. An players hai chu lawmin hun hlimum tak an hmang. A thenin club neitu Arab mi hausa, sum tamtak senga City ropuina ramah thuoilut tu Seikh Monsour inzana inentirna an thaw bawk. Awle... khang khan Manchester City chu Premier League Champuin thar an ni tah a nih.

Wednesday 7 May 2014

11h Hmar Martyrs' Trophy; FAST (Rengkai) 3-2 Lamka Sporting Club

11th Hmar MArtyrs' Trophy khel mekah vawizantieng khan match hmunuom um takel ei hmua. FAST (Rengkai) chun an khingpui Lamka Sporting Club chu 3-2 a hnein Quarter final anin hlangkai.


Hi mach a hin 2nd half tan ani anthawk sawtnawte hnunga buoina a suoka 30mins lai inkhel sukchawl ani hnungin anin khel zawm thei nawk. Khang ang buoina kha Martyrs Trophy ei nei anthawk ei vawihni tuokna ani tah a, inzak a umin a muolpho thlak hle. Match official haiin an thutlukna siem an fethleng pui ngam naw kha chu dem an um ve hle.


Hi match hi a pawimaw takzeta, a san chu FAST hai hi hrat ngei ngei ngai an ni a. Chuong lai zing chun LSC hai hi anin hnetawk ani khawmin Quarter final kai thei an nih. Hi lei hin game boruok hrim hrim khawm a sosangin, fan khawm an phura entu mipui an thahnem hle.


Inkhel tan ania, FAST haiin hne ngei ngei an ngai ani ti inhrie in an nawr nghala, goal khawm an thun teu hle. LSC game an fuk tana, 11mins ah an chance vawikhat neina ah goal hung thun nghalin 1-0 in hma anthuoi. Hi zo hin FAST haiin thei tawp suoin an nawr ve nghala 22mins ah goal hung thun vein an goal bat an rul. Hi zo hin team pahni hai hi anin hnetawk hle a, game hmunuom um tak a nih. Goal dang lut ta loin 1st half ah 1-1 in anin hnetawk.


2nd half tan ania, game a hot in en an hawi hle. 60mins lai vel FAST winger PK chu box sungah sukthluk ania, hi leihin referee chu penalty a pek. Hi penalty hi Michael Zote chun petin a goal chieng hle a chu buoina intan na ani hlau. Penalty a pet ding lai hin player thenkhat chu box sungah an lo um a. Hi hi LSC players hai chun  an complain a, ana chu referee in an pet tir tho a goal in a pawm.LSC player hai chun complain sunzawmin inkhel thei loin 30mins lai an chawl hnungin penalty inpet that tir nawk annia. Hi penalty hi Michael Zote bawkin pet nawkin keeper in ropuitakin a lo save.


FAST chun nawr sunzawm nawk nghalin goal 2 inrang takin an hung thuna 3-1 in hma anthuoi. Hun tawp tawmin LSC haiin goal 1an hung thun ve a. Goal dang lut ta loin 3-2 in FAST haiin hnena changin quarter final anin hlangkai.


Hi game chung changa match official hai thutlukna siem a khan iem i ngaidan  ???



Tuesday 6 May 2014

11th Hmar Matyrs' Day Match Result

Zenhang Lamka Y/C 2 - 3 Hmarveng YC









Muolvaiphei Youth Club (A) 2 - 1 Bethel YC


Bethel YC Player hai anin warm up mek..