Barcelona le Atletico Madrid hai anin hnetawk

Champions League khawm a hmawr an bawk ţan meka. Vawizan khan quarter final hmasatak 1st leg khel ania. Barcelona chun La Liga hmathuoitu Atletico Madrid Camp Nou ah an lo mikhuola, goal khan ve ve inpe in anin hnetawk. Hi match a hin Atletico ta dingin Diego chun goal ropui takel thunin. Hi goal hi Barca ta dingin Neymar chun a hung rul a. Atletico hin away goal neiin 2nd leg a khawm hi hi a ţangkai hle ding a nih. Atletico hi kum 1999 hnunga Champions League quarter final an kai vawikhatna anih a. Anin khelpui Barca ruok hi chu European experience hau em em le vawili lai lo champion tah an ni thung. Ana chu anin khel anthawk hin hieng team pahni hai inkar hi a chien ta hle niin an langa. Atletico hin La Liga ah hmaţhuoitu an ni khawm hi a lo mak ta nawh. Tuta season vawili anin draw na ani ta bawk.

 LINE UP : Barcelona XI : Pinto, Alves, Piqué, Mascherano, Alba, Busquets, Xavi, Fabregas, Iniesta, Neymar, Messi Subs : Oier, Adriano, Song, Bartra, Sergi Roberto, Alexis , Pedro

Atletico Madrid XI :Courtois; Juanfran, Godín, Miranda, Filipe Luis; Gabi, Tiago; Koke, Arda Turan; Villa, Diego Costa Subs : Aranzubia, Alderweireld, Insua, Mario Suárez, Cristian Rodríguez, Sosa, Diego.

 Inkhel ţan ani a, mikhuol team Atletico Madrid chun David Villa hmangin 4mins na ah goal anthun teu hle. Hi zo 12mins ah Pique chu injury leiin thlak a ngaia. Team pahni hai hi anin beitawk hle. 28mins ah Atletico thiempuipa Costa chu injury leiin thlak a ngaive nawka. Ama hi Diego in a hung thlak a nih. Atletico an khelţha peia chance khawm neiin goal ruok chu an thun el thei nawh. Barca khawmin Messi hmangin chance an nei ve zeu zeu. 1st half goal um loin a tawp.

2nd half ţan ani a, Atletico chun 1st half a an khelţhat sawm peiin an nawr sunzawm nawk nghal. An phu ang ngeiin 56 minutes ah Diego chun 30yards anthawk goal ropui takel a thuna Atletico chun 1-0 in hma anţhuoi. Barca chun goal thun gei tumin an hung nawr ve a anin beitawk hle. A tawpah 71 minutes ah Neymar chun Inesta pass thatak anthawk goal hung thunin anin draw tah. Hi zo hin Barca'n an nawr nasa ve hle a. Inesta chun chance thatak a neia ana chu Courtios in a lo save hman. Huntawp tawm 4mins vel la um ah Messi freekick ţhatak chu Courtios bawkin lo save nawkin Atletico a san him. Hun tawpzui nghalin 1-1 a inhnetawkin anin ţhe a. 2nd leg hi Atletico hai ground Vicente Calderon ah khel ning a tih.