Premier League title lak kan la tum - Michael Carrick

Manchester United midfilder

Michael Carrick chun Premier League title lak an la tum thu a hril. Ei hriet seng angin United hin tuta season khawm Luis Van Gaal a hnuoiah season bul anțha naw hle a. Sienkhawm hungin siemțha in an game nuhnung paruk haiah hnena an la chang vawnga. Hi lei hin beiseina insangtak khawm an nei ta ni ngei a tih.

Carrick chun The Telegraph hrilin " League a hin a hrattak chu ning kan tih ka ti thei nawh. Ana chu tuta kan ngirhmunah chu hi hi kan tum a nih. Top 3/4 a kan lung a awi naw a. A chungtak ni hi kan tum ding chu a nih" tiin.

Manchester United hin Premier League title an la lak thei i ring am?

Hmar FC chun penalty shoot out ah SSPP hnein NE Tamchon Memorial ah an CHAMPION

8th North East Tamchon Memorial Football Tournament chu khel zo ta niin, final ah Hmar FC chun an khingpui SSPP chu penalty shoot-out ah 7-6 a hnein a zawna a vawihni na dingin an CHAMPION. Hi match a hin hun pangngaiah goal khat ve ve inpein anin hnetawka. Hun pekbel niin entra time a khawm goal um loin an lan hnetawk rawpa. Penalty shoot out hmanga a hratlem zawng niin, Hmar FC hin hnena hlutak changin an CHAMPION ta a nih.

Hi final match hmunuomum takah hin 1st half ah SSPP in game anthunun lema, midfield ah ei bak met niin anlang. Goal attempt khawm SSPP in 7 an neia, Hmar FC'n 4 an nei. Ana chu a tu tu khawmin goal thun thei bik loin 1st half a hin goal lut um loin anin hnetawk.

2nd half bultieng khawm hin SSPP bawk an chung lema. Nawr khawm an nawr sasa lem met. SSPP hin ground ball an hmang nasa hle. Ana chu a tu tu khawmin goal anthun el thei bik nawh. Hun tawp tawm in SSPP chun Ngangam hmangin an goal hmațhuoina an hung thuna. 1-0 in hma anțhuoi. Hi goal a lutzo sawtnawte hnungah Hmar FC chun Thompson hmangin an bat hung rulin goal khat ve ve thunin hung pangngaiah anin hnetawk leiin entra time an khel a ngai ta a nih.

Extra time 1st half a hin SSPP haiin penalty an hmu a, goal thuntu Ngangam chu hung ngirsuokin a pet a. Ana chu a pet over hlau a, Hmar FC an vangnei takzet. Entra time 1st half khawm goal dang la lut chuong loin an lan hnetawk. Entra time 2nd half a khawm an lan hnetawk pei a. Hun tawp chen goal lut um loin penalty hmangin a hratlem zawng a ngai ta a nih. Hratlem zawng a ni a, HMAR FC chun 7-6 a hratna changin hnena hlado samin ON MAWI an dawm.

photo Courtesy - DannisBuhril

Iengtik lai kawm kan ring zing, khawlai hmunah khawm, Floyd Mayweather hi anih, inhnek ngamlo chu-- Manny Pacquiao

Boxing Khawvel in thlumte thlira a thlir, a la thlir dawk thei si lo chu Manny Pacquiao le Floyd Mayweather inhnek ding mawl hi a nih. Hieng hai pahni inhnek neka ropui lem ding hi Boxing khawvela hin a um chuong ding mani..!! An pahni inhnek ding hi a takah la tlung naw sienkhawm sum $1 billion lai an leng ding a hisap ani a, infiemna khawvela vawikhat thil thua sum tam tak ding ti na ani chu.

Vawi 8 lai World Champion lo ni tah Philippines pa rorum Pacquiao chun hnelo la tawng lo, American pa hrat khawkheng Floyd Mayweather chu sawiselin, ama leh inhnek a ngam naw thu a hril. Manny Pacquiao chun Daily Telegraph hieng hin a hril " Kanin hnek naw ani khawmin pawiti na nei naw ningah. Kei chu iengtik lai kawm, khawlai hmunah khawm kan pei zingah, ana chu ama hin a ngam nawh. Kan hnekpui nuom ani ti khawm ka hril chieng ta a, ama ah an nghat tah.

"Kei le inhnek a pumpel tum ani ti hi an hrietthei. Suonlam a siem char char a, inhnek kan ta Ṭawng khawm tawp hmak raw seh" tiin.

Mayweather in social media Ṭhenkhat haiah a pawisa le thla anlak hlak khawm hi Ṭha a ti naw thu Pacquiao hin a hrilin a sawisel sa bawk. Pacquiao chun " A thil ngaitu le a thil thaw hai po po hin khawvel inhawi chenna cho an langtir hi pawi ka ti pui takzet. Thlarau thienghlim inchuktirna kha a theinghil ta khawm ning a tih" tiin a hril.

Saturday hin Manny Pacquiao le American boxer Chris Algieri hai hi Macau hmunah inhnek an tih.

Mikhuol inthlahrung lo NorthEast United.

Indian Super League khel mekah vawizan khan NorthEast United chun Mumbai khawpuiah Mumbai City FC chu an va lutchila, ondwani Mtonga le Felipe hai goal thun hmangin harsa lo takin 2-0 a hnena changin ISL table ah pahnina ah anin vawrkai. Mumbai City FC hi game 3 khel ta in vawikhat char hnena anla chang a nih.

Inkhel an țan a, Mumbai an khelțha nghala. Chance khawm nei nghalin 7mins ah Andre Moritz chun box puo char ah goal shot ropuitak a neia, ana chu goal zawnah a fe naw char. NorthEast an khel buoia, an defender haiin sin an hau hle. Mumbai hin ball khawm chang rawn lemin, an nawr deu zinga. Ana chu chance thatak anin siem el thei bik nawh.

Anin khelsawt deu deu a, NorthEast game in hma a hung sawn peia, chance khawm an hung nei ve zeu zeu a chu goal an thun thei bik nawh. A tu tu khawmin goal thun loin 1st half ah anin hnetawk.

2nd half an țan a, NorthEast in hartharna changin an khelțha hle a. Boro anthawkin Chance khawm an nei nghala chu an hmangțangkai thei bik nawh. NorthEast in an nawr sunzawm zinga, 58mins a hung in hersuok meu chu an dit an hmu. Team work ropuitatk anthawk Koke chun ball lalutin Kondwani Mtonga ta dingin a chip pek zau a, ama hin Mumbai keeper man hma charin petin a goal chieng hle. NorthEast chun hma anthuoi der.

Mumbai hin theitawp suoin nawr let ve an tuma chu an nawr hlei thei naw a. NorthEast bawk chunghnung lemin an khelțha sunzawm zinga. 73mins ah Ljungberg chu a malpui bul nat leiin a khelsunzawm thei ta maw a. Mumbai hin an substitution siem thei zat an hmangzo ta leiin mi 10 chauin an khel ta a nih.

A kimlo a, khel ta an ni leiin an nuom angin an nawr thei ta naw a. An beidawngna sukzuol tu dingin 75mins ah Cmovs chun Keene a petthluk leiin second yellow card hmuin red card peka hnawtsuok ani a. Mumbai chu player 9 chaua khelin an ta dingin nawr rak ngaina a um ta naw hle.

NorthEast in an nawr na deu deu a, chance khawm an nei rawn hle. Hun tawp tawm 90+2 mins ah NorthEast chun an goal 2 na dingin goal khat dang an hung thun bel. James Keene chun nal takin Mumbai defender a hlem hungin box sirah ball a lakluta. Vengtu neilo Felipe chu pein ama hin mawi takin goal sir tieng petin a goal nal hle. NorthEast chun harsa lo takin kimlo a khel Mumbai chu 2-0 in an hne.

Mumbai City FC Mizo player Lalrindika a khelțha hle a. AMUL Fittest player of the match pek ani a. Sienkhawm a team hai ruok chu hnena a changpui zo nawh

Atletico de Kolkata coach in a hnek thu Pires in ami hril - Zico

Brazillian legend le FC Goa coach Zico chun zani zana Atletico de Kolkata leh anin khel țum khan, half time lai Kolkata coach Antonio Lopez Habas in Pires a hnek niin Pires in a kuomah a hril thu a hrillang.

Inkhel zoah Zico chun reporters hai kuomah hieng hin a hril " Thil tlung pawitak pakhat chu kan players hai team dang coach in an hnek thu hi a nih. Pires in Atletico de Kolkata coach in a hnek thu ami hrila, thil inzakum tak a nih."

"Ka player hai thil mi hril ka hrilsawng cheu ani a, kei chun ka hmu nawh. Ana chu chu Pires hin khel hrilin, thiltlung naw chu ami hril ka ring nawh." tiin a hril.

Hienglaizing hin Kolkata co-owner Utsav Parekh khawm țawngsuok vein, hieng hin a hril "Kha thiltlung lai khan tukhawm kan um naw a. ISL ah hi chungchang a thudiktak suisuok dingin kan ngena, thudiktak an suisuok ngei ka beisei."

"CCTV footage khawm a uma, hi taka inthawk hin chu thudik suisuok antak ring aum nawh. Hi thiltlung hi chu CCTV anthawk iengkim hmu thei vawng ning a tih." tiin a hril.

Hi thiltlung chungchang hi ISL chun an suizui ding thu an puonglanga. Team pahni hai hin ISL anin hriettir ve ve ta a. Tu hin ISL regulator committee kutah peksuok ani ta thu ISL chun a hril. Arsenal legend hin thudik a hril le hril naw chu hrietthei vat ani ta ngei ring a um.

NorthEast United le FC Goa anin hnetawk.

Hero Indian Super League fe mekah vawizan khan NorthEast United chun Indira Gandhi Athletic Stadium ah FC Goa an lo mikhuola. NorthEast United hin goal an bat zet hnungin, sawisel theitak penalty hmangin an goal bat rulin, points 1 ve ve hlawsuokin anin hnetawka. ISL fe mekah a vawikhatna dingin FC Goa chun points an hlawsuok ve tah.

Hi match a hin NorthEast in an first XI an siksawi nuola. Keeper chetha em em Alexandros Tzorvas chu inchawltir in Rehnesh TP in goal a venga. Miguel Garcia, Robin Gurung le Dong-Hyung Do hai khawmin Boithang Haokip, Milan Singh le James Keene hai hmun an hung hluo bawk. Goa tieng khawm Andre Santos in a debut game a khel bawk.

1st half a hin mikhuol team an tlangnel lema, ana chu NE in chance nei hmasa lemin mins 6 na ah Capdevila free kick chu an deflect hnungin Goa keeper in a lo nam suok hman hram.

Hi zo hin Goa chun hung nawr ve nghalin chance khawm an nei zeu zeu nghala. 17mins ah Gregory Arnolin chun shot thatak neiin goal khang a denga, hi ball hung kir hi Zodingliana clear thatnaw zar zoin Gregory Arnolin bawkin goal ah an changtir. Goal chu hma anthuoi nghal. NorthEast in hung nawr vein 36mins ah sawisel theitak penalty hmangin Sergio Koke chun goal a hung thun. Hi penalty hi Debabrata Roy in ball a clear na a Robin Gurung hnungtieng anthawk a themfu met leia a pek niin an lang.

2nd half a hin NorthEast United in hartharna changin bul khawm an tan tha le a. Chance tamtak insiemin, goal khawm thuntheina huntha an nei rawna chu a pawimaw tak goal ruok chu anthun thei bik ta nawh. Hienglaizing hin Goa khawm an um mei2 nawa, an goal nawr a na in, an chance nei an hmangtangkai teu thei ve hle. 71mins ah Goa ta dingin Martins in goal a thuna chu offside leiin pawm an nawh. Hun tawp chen goal dang thun ta loin anin hnetawk.

Khang zozai chance neia an hmang tangkai thei naw kha NorthEast United chun pawi ti hleng an tih. Chu lai zingin Goa hi an game a lan fuk naw hle a, ISL ah hrat hmel hmu vat an nuom ani chun anin ennawn that hle ngai a tih.

#8States1United

NorthEast United striker James Keene in India rama a thiltuok a hrilna.

NorthEast United striker kum 28 mi James Keene hi ISL ah English players pathum hai laia pakhat ani a. Ama hi Postsmouth academy suok niin Premier League a khawm a debut game Harry Rednapp hnuoiah a lo khel ta bawk.

Keene chun hieng hin a hril " Ei kawl le vel ei hang fanga, a beidawng thlak takzet. Tui let lai motor khal a ngaia, lo neitu hai hlak an bawng, kel le an beram ruol hai khawlai hmunah khawm ei hmua, thil maktak chu a nih."

"India ramah chu bawng hai hi ran thienghlima ngai an ni a, ei sukna kek chun £400 ei chawi anel. Vangnei thlak takin driver ka nei hlaua, iengtik lai khawm hi ramah hin chu motor khal ngai nawng ka tih. Ana chu Driver haiin indicator in an kut an hmanga, a pit pit (horn) hlak chu a ri a tawp naw reng reng. 24/7 a pit pit (horn) an hmeta, a break nek khawmin an hmang nasa lem."hahaha

" Lampuiah hai hlak pa pakhatin cycle hung khal a ta, a hnungah a nuhmei phur a ta, a nuhmeiin naute pahni vel a la pawm nawk hlak. Car po po deuthaw hi a hmelhem vawnga, asan chu anin tawk nasa thei taluo lei a nih."

"Promotional work le inzawmin Shillong (Khuo chite tlang sipa um, NorthEast United neitu pakhat um na ah) ah kan fe a. Bar pathum i hmu chu vangnei inti hle rawh. Internet connection hlak tha lo, thaw ding a um naw takzet."

"Training ground le stadium thatak kan nei a. Ana chu hi hi mihriem makteduoi 5 bawr vel umna a inkhelna hmun tha umsun a nih. A dang hai chu a sie fai vawng a nih" tiin a hril.

FIFA'n World Cup ah Golden Ball dawng thei ding shortlist a puong.

FIFA chun 2014 Golden Ball dawng thei ding players shortlist a puong langa. Hi lawmman hlutak hi World Cup 2014 sunga khelţha tak player kuomah inhlan ning a tih.

Hi bakah hin Golden Glove le best young player lawmman dawng thei ding players hai khawm an puonglang sa bawk. Lawmman dawng tu ding hai hi Sunday ah World Cup final khel zo ah puonglang ning a tih.

Golden Ball nominee hai;
 Mats Hummels (Germany)
Thomas Muller (Germany)
Toni Kroos (Germany)
Philipp Lahm (Germany)
Lionel Messi (Argentina)
Javier Mascherano (Argentina)
Angel Di Maria (Argentina)
Neymar (Brazil)
Arjen Robben (Netherlands)
James Rodriguez (Colombia)

 Golden Glove nominee hai:
Keylor Navas (Costa Rica)
Manuel Neuer (Germany)
Sergio Romero (Argentina)

 Best Young Player nominee hai:
Memphis Depay (Netherlands)
Paul Pogba (France)
Raphael Varane (France)

Barcelona le Liverpool chu Suarez manah anin rem tah

English club lien Liverpool chun Barcelon ah an striker tha Lius Suarez chu £75million velin zawrdawk an remti tah. Suarez hin Barcelona ah kum 5 dei contract ziek a ta, number 9 zakuo hak bawk a tih. Karthar ah Barcelona ah fein medicel nei a tih.

Kum 27 mi Uruguayan striker hi tuta World Cup fe mekah hin Group stage khellai Italian defender CHiellini a se leiin thla 4 sung FIFA in a hrem mek a nih.

Suarez hi season hmasak khan Premier League ah goal 31 thunin top scorer niin, PFA le Football Writers' Player of the Year dinga thlang a ni bawk,

Kum 2011 khan Netherlands club Ajax anthawk Liverpool hi £22.7m in a zawma. Tuhin Liverpool ah kum 4 dei contract a la nei. Liverpool a aum sung hin game 133 khel tain goal 82 a thun ta bawk. Tuta a transfer fee hi confirmed ani hunah, khawvela players manto tak pathumna ani ta ding a nih.

Argentina chun penalty shoot out ah Netherland hnein World Cup FINAL an lut

World Cup semi final nuhnung lem chu khel zo ni ta in, Argentina chun Netherland chu penalty shoot out ah 4-2 a hnein FINAL anin hlangkai a. Final ah Germany leh 12th July hin Rio De Janeiro khawpuia, Maracana Stadium ah khel an tih.

Hi match a hun hun pangaiah goal um loin anin hnetawka, extra time khel nawk niin goal lut um chuong loin anin hnetawk nawka. Penalty shoot out hmangin a hratlem ding zawng ani a. Argentina chun 4-2 a hnein World Cup FINAL anin hlangkai ta a nih. Penalty a hin Argentina keeper Romero chun ropui tak takin vawihni lai a save a, Argentina tieng hin goal an thun vawng.

A match hrin hrim hi game hmunuom um taka hril thei ding ni naw sienkhawm, team pahni hai khel hi an fimkhur hle a, suksuol a lawma, game mar tak chu a nih.

Inkhel ţan hma charin zani hmasak laia thi Di Stefano thi sunna an nei a. Hi zo char hin game ţan nghal niin, team pahni hai an fimkhur duna, ball anin pekkuol nasa hle. 14min ah Parez chu box puo sir ah sukthluk niin freekick a hlawsuoka. Messi chun petin keeper in mawi tak a lo save.

Hi zo hin Argentina game an hma hung sawnin an nawr nasa lem deua. Corner khawm iemanizat hlaw suokin chance ţha ruok chu an nei thei bik nawh. Anin khelsawt deu deu a, team pahni hai hin chance nei lawm loin midfield ah anin nawr nasa hle. 1st half ah goal um loin anin hnetawk.

2nd half a khawm game a danglam chuong lawm naw a. Midfield ah ball a tamin a tu tu khawmin anin nawr hlei thei meu nawa. Attacking third velah ball anin lakpek zung zunga, kawngkhat taka chu game en inhawi ve tak chu a nih. Argenina hin ball chang rawn lemin tlawmin an chunghnung lem theta, an a chu a tu tu khawmin goal chance tha an nei meu nawh.

2nd half tawp tawm deu hin Netherland game in hma a hung sawn deua, hun tawp tawm 90+1mins ah Robben chun Netherland hratna goal a thun teu hle, Box sung hnaite a a shot chu Mascherano in a hung dang hman hram.Goal lut um loin hun pangai a tawpa, extra time khel a ngai ta a nih.

Extra ime a hin tlawmin Argenina players hai hi an chau deu ta niin an langa. Netherland in an nawr nasa ta hle a chu chance an nei thei bik naw a, chance tha taluo um loin chawllawk an hmang.

2nd ahle extra tine a khawm game an dang lawm naw a, Netherland chun nawr lem deu hai sienkhawm Argentina hin chance tha an nei rawn lem. 116mins ah Palacio chun chance tha neiin keeper cho a un ta ti ah a head a, Dutch keeper Cillessen in harsa lo takin a lo man.Hi zo char khawm hin Maxi chun Messi thaw ra sikin chance tha a neia chu a hmang tangkai thei naw. Goal lut um nawk loin penalty an pet ta a nih. 

Penalty a hin Netherland chun pet hmasa in Vlaar le Sneidjar hai pet chu Romario in mawi tak takin a lo save a, Argentina hai hinan rengin pet goal in, Messi, garay, Aruero, Maxi haiin an pet goal vawng a nih

Klose in World Cup history a siem zanah Germany lakah Brazil an hmin

World Cup semi final hmasa lem chu Belo Horizonte ah khel zo tain. A mikhuoltu Brazil chu Germany lakah 7-1 laia tlawmin World Cup history ah semi final in hnena nasa pawltak niin Brazil World Cup inzinna ram chu suk tawpin a lo um ta a. Germany chun 2014 FIFA World Cup FINAL in hlangkaiin Argentina le Netherland hai a hrat lem lem leh FINAL an khel ding a nih.

Hi match a hin Germany ta dingin Substitute Schurrle le Toni Kroos hai chun goal 2 thunin, Klose, Muller le Khedira haiin goal khat seng an thun bawk. Klose hin hun sawttak World Cup a goal thun rawntak nina lo chel tu Brazillian Ronaldo record ropuitak chu khumin, World Cup ah goal thun rawntaj hung ni tain goal 16 a thun tah. Brazil ta dingin hun tawp tawmin Oscar chun goal khat a thun ve hram.

Brazil hi an Captain Thiago Silva chu yellow card vawihni a hmu ta leiin hrem niin a khel thei naw a. Anin nghatna Neymar khawm hliemna leiin a khel thei naw bawka, hi hi Brazil chun an tuorpui ta niin an lang. A khel hrim hrim khawm hi Germany an phak naw hlea. Brazil defender hai an che buoi hle bawk. Germany attacking a ropuia. A bikin Muller le goal hni thuntu Toni Kroos an khel tha hlea, Bench anthawka hung lut Schurrle khawm a kheltha hle bawk.

Inkhel anţana, game hmunuom um taka, team pahni hai game an rangin anin nawr pawp pawp nghala. Chance um nghal naw sienkhawm team pahni haiin attacking game hmunuom um tak an min entir. 11mins ah Tony Kroos corner ţhatak anthawkin vengtu neilo Muller chun mawi takin hnaite ah pet goal in 1-0 in hma anţhuoi.

Germany an khelţha ta hle a, an nawr sunzawm zinga 23mins ah Klose chun goal hung thun nawkin 2-0 in hma anţhuoia. Klose hi World Cup ah goal thun rawn tak ni tain goal 16 a thun tah. 24mins ah Toni Kross in box sung charah kaw takin goal kil sir ah petin g goal nal hleta, 3-0 in hma anţhuoia, 26mins ah Kroos bawkin a goal 2 na a thun nawk. 29mins ah Ozil chun box sungah Khedira pein ama hin awlsam takin goal thun nawkin Germany goal 5 na a thuna.

1st half ani meu chu Germany chun Brazil lakah 5-0 in hma anţhuoi a. Final lutna dingin ngirhmun ţhataka an ngir mek.

Half time a hin team pahni in substitution an siem nuol ve ve a. 2nd half anţana, a bultieng hin tlawmin Brazil an hung khelţha deua chu goal a thun thei nawh. 53mins ah Oscar shot chu Neuer in harsa lo takin a lo save. Hi zo char khawm hin Paulinho chun shot ţhatak a nei a chu Neuer bawkin ropuitakin a lo save nawk.

Germany chun hung nawr let ve nawkin 63mins ah Muller chun chance ţha anei a chu a hmang ţangkai thei nawh. 69mins ah Lahm cross ţhatak anthawk substitute Schurrle chun box sungah Germany goal 6 na a thuna. 79mins ah bawk Muller pass anthawk Schurrle bawkin box sunga a lak thla a, first time in shot nghalin goal chungkhang dengin a goal nal hle. 7-0 in Germany chun Brazil lakah hma anţhuoi.

Brazil game a fuk thei meu nawa, hung tawp tawm tieng lem chu Germany keeper Neuer an sukbuoi meu nawh. 90mins ah Ozil chun chance ţha taluo lost in keeper le cho an um ta ti ah, goal sir ah a pet hlau. Minute 2 pekbel an ni a, Marcelo through ball ţhatak chu Oscar in hnawt lutin Brazil goal khatna thun ve hramin 7-1 in hun a tawp. Germany chun Brazil sawpin World Cup final an lut.

Germany chun France hnein World Cup semi final an lut.

Brazil World Cup khel mekah quarter final hmasataka Germany le France anin khela. Germany chun 1st half 13mins ah Mats Hummels goal thun hmangin 1-0 in France hnein semi final anin hlangkai. Germany hi World Cup vawi 4 a zawna semi final tlungthei umsun an ni tah.

Hi match a hin, inkhel pumpui thlirin Germany an chunghnung lema. Midfield ah France in an phak naw hle a. Chance khawm hau lemin an goal nawr khawmin umzie a nei lem hle. Valbuena le huntawp tawma Benzema chance ti lo chu chance ţha ti a hril ding an nei meu nawh.

Inkhel anţan a Germany khel ţha lem deuin ball khawm an chang rawn lema. Ana chu defence line ah an chebuoi ţep tep. 13minstah Pogba chu Tony Kross pawtthluin freekick a chawia. Hi freekick hi Kross bawkin petin mawitakin goal ah a vawr luta, Mats Hummels chun mawi em em in Lloris man phak loin head in cross bar a denga, a goal nal hle.

Hi zo khawm hin Germany bawk an chunghnung lema, France in an nawr hlei thei nawa foul khawm an foul ngun hle. 33mins ah Matuidi chun ball nal takin a chip luta, box sungah Valbuena'n ţhatakin a lo shot a, Neuer in ropuitakin a lo save.

France game hi tlawmin an kang deu a, chu umzie nei taka goal nawr an neithei meu nawh. 43mins ah Benzema chun box sungah goal shot a neia chu Neuer ta dingin a harsa nawh. Goal lut um ta loin 1st half bh Germany chun Hummels goal hmangin 1-0 in hma anţhuoi.

2nd half anţan a, beisei lo ang takin France an hung khelţha hle. An goal nawr khawm a na ta hle a, Germany defender hai le Neuer an sei buoi zeu zeu. Germany khawmin an nawr ve zinga chu chance ţha an nei thei ta meu nawh.

68mins ah Germany chun substitution siemin ţangkai beklo Klose lasuokin Chelsea Winger Schurrle anin luttira. 69mins ah Muller chun box sir anthawka a shot chu Sakho in a lo deflect a, goal sir charah fein a goal teu hle.

Hi zo hin team pahni hai hi anin nawr tawn zak zaka, half chance ang khawm a um zeu zeu. 80mins ah France chun corner hmuin, hi taka inthawkin Germany chun counter attack anthawk goal anthun ţep. Ozil ball cross chu Muller in a pet ţhela, Schurrle chun lo lain goal ah a shot nghala, Lloris chun a lo save.

Anin nawr tawn zinga, hun a fe duok duok a. Hun pangai a tawp hnung 90+3 mins ah Benzema chun box sunga ţhatakin a shot chu Neuer in lo save a. Hun tawpzui nghalin Germany chun France chu 1-0 a hnein World Cup semi final anin hlangkai.

Brazil chun Colombia hnein Germany hnung zuiin semi final an lut.

World Cup quarter final khel hnina ah Brazil chun an khingpui Colombia chu 2-1 a hnein semi final an lut a. French hnetu Germany leh semi final ah anin nuoi ding a nih.

Hi match a hin Brazil ta dingin Thiago Silva le David Luiz haiin goal an thuna. Colombia ta dingin James in 2nd half ah penalty anthawk goal a thun bawk.

Inkhel anţana, anin nawr pawp pawp nghala, team pahni hai game an rangin hmunuom a um hle. 7mins ah Brazil chun goal thunin Neymar corner pet anthawk vengtu neilo Thiago Silva chun hnaite ah a dang luta. 1-0 in Brazil chun hma anţhuoi nghal. Hi goal lutna san hi Colombia defender hai marking ţhat naw lei ei ti thei awm ie.

Hi goal lut zo hin Colombia khawmin hung nawr let vein 11mins ah Cuadrado chu Oscar clear ţhat naw zar zoin box puo charah shot ropuitak a neia, Thiago Silva in lo deflect in goal sir charah a fe.

Game an rang pangaiin an rang zinga, Brazil bawk chunghnung lemin an goal nawr khawm a na takzet. A sir ah Hulk a ţangkai hle a, goal shot ropuitak tak a nei.

Colombia game an fuk hleithei nawa. James Rodriguez khawm nidang angin a khel naw hle a Julio Cesar ta dingin sin an pek lawm nawh. Goal lut um ta loin 1st half ah Brazil chun goal khatin hma anţhuoi.

2nd half anţan a, Brazil bawk an chunghnung lem deu a. Ana chu chance an nei thei bik nawh. Game khawm an dang chuong naw a, physical game indiktak ei hmu nawka. Inkhel hmunuom um tak chu a nih.

Colombia game khawm tlawmin a hungin kang meta, an goal nawr khawmin umzie a nei deu tah. 65mins chen chu a tu tu khawmin goal chance ti a hril thei ding a um meu nawh.

69mins a hungin hersuok meu chu David Luiz in freekick anthawk goal ropui a thun. James chun goal anthawk 30 yards vel anthawkin Hulk suk thluin freekick le yellow card a chawia. Hi freekick David Luiz chun kaw takin goal kil sir ah a pet a, keeper ta dingin dang ngaina a um nawh.

Colombia khawmin nawr ve nghalin, 78mins ah James ball pek ţhatak chu Bacca in box sungah tlanlut puiin Julio Cesar in a lo suk thlu a, penalty a chawi. Hi penalty anthawkin James chun goal thunin an goal bat pakhat rulin 2-1 ani tah.

Hi zo hin Colombia game a fuk takzeta, nawr khawm an nawr nasa ta hle. Sienkhawm hun tawp chen a pawimawtak goal thun thei ta loin 2-1 in an tlawma. Brazil chun hnena chang Germany leh in nuoi dingin semi final an lut.

Hi match a hin Brazil innghatna Neymar chu hun tawp tawmin zawn suok ngai hiel khawpin a hliema, ieng anga serious am ani ti hriet ni naw sienkhawm Germany le semi final an khel hunah a ţhangtheit naw pal inlau pui a um hle.

World Cup fact : I lo hriet ta hlak am?

1. Kum 1982 anthawk khan Germany hin World Cup Quarter final an la lut zie.

2. Costa Rica le Colombia hin a vawikhatna dingin World Cup Quarter final anin hlangkai ve ve.

3. USA le Belgium anin khel ţum khan USA goal nghaktu Tim Howard in vawi 15 lai a save a, World Cup match khata save rawntak niin record a siem.

4. England left back Luke Shaw kha kum 18 niin World Cup players naupangtak a nih.

5. Kum 5 liem ta khan England FA in English football ah £450 million lai an hmang ral a, Costa Rica ruok chun £2million. I hrietthiem el ring a um.

6. Suarez hin mi a se leiin game 39 lai a khel hrem ani ta a (a khel naw ding mek hai leh). Ana chu RED CARD a la hmu ţhak nawh.

7. Brazil hai hi World Cup ah goal thun rawn tak ni ta in, goal 201 lai an thun tah.

8. Pele hi World Cup ah goal thuntu naupangtak niin ama hi World Cup 3 ah Champion thei umsun player a nih.

9. World Cup a hin foreign coach champion an la um ţhak naw a. Vawi 18 lo champion ta hai kha an ram ta ding pei ani a. Hieng hai lai hin Italy coach Vittorio Pozzo hi vawihni champion thei umsun niin kum 1934 le 1938 haiah khan cup a lo dawmpui.

10. World Cup khel ani anthawk rambung 76 in an khel ta a. Brazil hai hi a ţhangkim thei umsun la niin vawi 19 anthang ta a. Germany le Italy in dawtin vawi 17 ve ve anţhang.

Angel Di Maria'n hun tawp tawmah Switzerland inkhaina hrui a suk chat

Argentina chun extra time tawp tawmah Di Maria goal thun hmangin Switzerland chu 1-0 a hnein quarter final an lut.

Hi game beisei phak bek lo a hin hun pangai ah goal um loin anin hnetawka. Extra time khel niin penalty pet na dingin 2mins cho a um ta hnunin Messi chun ball la pheiin goal tieng a tlanpui a, mawitakin vengtu neilo Di Maria pein, ana hin Argentina hratna goal thun a quarter final anin hlangkai tah. Hi match a hin Messi hi Swiss defender haiin an veng nasa hle a, space khawm a nei thei meu nawh. Ana chu a class insang zie suklangin hienga an veng nasa khawmin Man of the Match ni thei dingin a la khela. Hun tawp tawmah Di Maria goal thun ding mawi akin a la siempek bawk.

Inkhel anţan a team pahni hai anin hnetawk hle a. Argentina in tlawmin nawr lem deu hai sienkhawm chance an neithei bik naw a. An pahni hni in an fimkhur a, an goal bul a hnei chun an clear vat vat. 27mins ah Switzerland in chance neiin Xhaka chun Sakhri cross box sungah a shot a chu Romero in a kein a lo dang hman hlau.

Argentina hi an game an fuk thei meu naw a. Umzie nei taka nawr khawm an neithei meu nawh. Messi ruok chu a khelsie hran nawh. 39mins ah Swiss bawkin chance neiin Garary through ball thatak chu Drmic in a hnawt luta, keeper le cho an um tah tia keeper a damte in a pass. 1st half ah goal um loin anin draw.

2nd half anţan a, Argentina an khelţha ta hle. Theitawpin an nawr a, half chance ang khawm an nei nuol. Messi khawm a khelţha zuola, ball a semdawk rawn hle. 58mins ah Rojo chun Lavezzi pass ţhatak chu cross/shot ang deuin goal ah petin keeper in a save.

Hi zo 63mins ah Rojo cross ţhatak chu Higuain in box sungah mawitakin a head a, keeper in ropuitakin a save. Argentina hin an nawr sunzawm zinga 69mins ah Messi chun box puo char anthawk shot ţhatak a neia, goal chung chara a fe hlau.

referee khel ve awi lo....

77mins ah Messi bawkin box sungah goal shot ţhatak a neia, Swiss keeper bawkin ropuitakin a lo save. Argentina bawk chunghnung in an nawr zinga chu a pawimaw tak goal ruok chu an thun thei bik nawh. Hun a liem duok duoka, 90mins sung Switzerland chun Messi le a pawl hai dang hnein extra time khel a ngai ta a nih. 1st half extra time a khawm Argentina bawk an chunghnung nawka. Switzerland haiin an goal an venghim hne thung. Goal um loin 1st half extra time a tawp.

2nd half extra time a khawm Argentina bawk chunghnung lemin goal thun ngei tumin an nawra chu chance tha anin siem thei nawh. Switzerland defence line ah ball anin suo nawk hlaka, Di Maria ţangkai vieu sienkhawm crossing ţha a pek thei meu nawh. Goal lut loin penalty shoot out an nei el dinga an lang laiin 118mins ah Argentina chun Di Maria hmangin goal anthun.

Palacio in Lichtsteiner lakpekin Messi a peka, goal ah Messi chun tlanlut pui nghalin mi 2 a hlem hnungin a sira vengtu neilo Di Maria chu pein ama hin a thawsuol naw hle. Mawitakin goal sirah a pet luta, Switzerland inkhaina hrui an chat. Argentina hi awlsam takin an hrat el dinga an lang laiin Switzerland in an hung nawr let ve a, goal khawm an thun teu hle. Shaqrir cross thatak chu Dzemaili head in goal ban a denga, hi hung bounce hin a ke fu nawkin a out char. 3mins pekbel an ni a, Switzerland hin hun tawp tawmah freekick an hmu a chu an hmangtangkai thei ta nawh. Hun tawp zui nghalin Argentina chun Switzerland hnein quarter final an lut.

A dive leiin Robben in ngaidam an hni.

Netherland winger Arjen Robben chun zani zana Mexico 2-1 a an hne ţum khan penalty hlawsuokna dingin a dive ngei thu hrilin ngaidam an hni nghal a. Ana chu hun tawp tawm 93mins a penalty a hlawsuok kha chu ani naw thu a hril.

Kha match a khan hun tawp tawma Klaas Jan Huntelaar in penalty anthawk goal a thun hma khan Robben hin vawihni lai penalty appeal a lo nei a. Sienkhawm referee chun a pek naw a, khang hai kha penalty hlawsuok a nuom lei a tlu tehleh (dive) ani thu hrilin ngaidam an hni.

Inkhel zo ah Robben chun " Ngaidam kan hni takzet a nih. Hun tawp tawma mi kha chu tluk der (dive) an naw a. Ana chu 1st half a mi hai kha chu tluk der a nih. Ka thaw naw ding ka thaw nih" tiin a hril.

Hieng hin ti dei inla, 1st half a Robben penalty appeal hai kha dive a lo ni khawmin thu hran ni raw se. Hun tawp tawma mi khawm kha dive tho an naw maw. . . . ? Robben hi hrem an lau leia ngaidam inhni mei mei ani thei ding am..? Hun tawp tawma mi nek hmanin a penalty appeal hmasatak khawm kha a awm lem

niin an lang, pek ding ani rau rau chun.

Hun tawp tawma mi kha Replay ei en chienga contact a um naw ti dinga inthem si ti ang cho a nih. Ana chu foul chu ang tak si chu a ni tho. Khang ang hun khir khan laia chawplechila thutlukna siem a ngai a, referee thutlukna khawm kha kawngkhat ngaituo chun a awm ve tho.

hi hi a awm lem naw maw.... ?

Iengkhawm nisien dive chieng players hai hi chu football suk hmelhem tu an ni rawp hlak. Player ropui ruok chun football ropuitak hi a suk hmingţha tu le suk ropui nawk zuol tu anni lem.

hi khawm hi pek ding ani rau rau chun a awm lem.